କଳାହାଣ୍ଡି, (ପି. କେ. ସାହୁ ) : ଲାଞ୍ଜିଗଡ଼ ବ୍ଲକ ବିଶ୍ୱନାଥପୁର ଥାନାଞ୍ଚଳର ଜଣେ ନବମ ଶ୍ରେଣୀ ଛାତ୍ରୀ ଦୁଷ୍କର୍ମର ଶିକାର ହୋଇଥିବା ଜଣାପଡିଛି । ଏହି ଘଟଣାରେ ଡଙ୍ଗାଜୋର ଗାଁର ସୋମନାଥ ହରପାଲ(୧୮) ନାମକ ଜଣେ ଯୁବକଙ୍କୁ ଗିରଫ କରି କୋର୍ଟ ଚାଲାଣ କରିଛି ବିଶ୍ୱନାଥପୁର ପୋଲିସ । ଜାମିନ ନାମଞ୍ଜୁର ହେବାରୁ ସୋମନାଥକୁ ଜେଲ ଯିବାକୁ ପଡିଛି । ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ବିଶ୍ୱନାଥପୁର ଥାନାଞ୍ଚଳର ଜଣେ ନବମ ଶ୍ରେଣୀରେ ପଢୁଥିବା ନାବାଳିକାକୁ ବନ୍ଧପାରି ପଞ୍ଚାୟତ ଡଙ୍ଗାଜୋର ଗାଁର ସୋମନାଥ ହରପାଲ ଧମକଚମକ ଦେଇ ଦୁଷ୍କର୍ମ କରିଥିବା ନେଇ ସୋମବାର ଦିନ ଥାନାରେ ଅଭିଯୋଗ ହୋଇଥିଲା । ଏନେଇ ବିଶ୍ୱନାଥପୁର ଥାନାରେ କେସ୍ ନଂ ୩୩/୨୦୨୧ରେ ଏକ ମାମଲା ରୁଜୁ ହୋଇଛି । ବିଶ୍ୱନାଥପୁର ଥାନାଧିକାରୀ ରୁନୁ କୁମାରୀ ମାଝୀଙ୍କ ନେତୃତ୍ୱରେ ପୁଲିସ ଗାଁରେ ଚଢଉ କରି ଅଭିଯୁକ୍ତ ସୋମନାଥକୁ ଗିରଫ କରିଥିଲା । ଏହାପରେ ମଙ୍ଗଳବାର ଉଭୟଙ୍କ ଡାକ୍ତରୀ ମାଇନା ଓ କୋଭିଡ ପରୀକ୍ଷା ପରେ ଅଭିଯୁକ୍ତ ସୋମନାଥକୁ କୋର୍ଟଚାଲାଣ କରାଯାଇଥିଲା । ଜାମିନ ନାମଞ୍ଜୁର ହେବାରୁ ତାକୁ ଜେଲ ହାଜତକୁ ପଠେଇ ଦିଆଯାଇଥିବା ଜଣାପଡିଛି ।